Pinga Ga Pori Pinga Marathi Serial Track:

Chhaya Kadam At Cannes Film Festival 2025: यंदाच्या कान्स फिल्म फेस्टिव्हलमध्ये (Cannes Film Festival 2025) जगभरातील सेलिब्रिटींनी हजेरी लावली होती. अशातच अनेक बॉलिवूड सेलिब्रिटींनीही (Bollywood Celebrity) यंदा कान्समध्ये आपला डेब्यू केला. दिवंगत अभिनेत्री श्रीदेवी यांची लेक जान्हवी कपूर, आलिया भट्ट, ऐश्वर्या राय यांसारख्या अभिनेत्रींनी आपल्या अदांनी कान्सचं रेड कार्पेट गाजवलं. पण, यासर्व अभिनेत्रींमध्ये एका मराठमोळ्या अभिनेत्रीनं आपल्या मैत्रिणींनी दिलेली साडी, आपल्या आईची नथ आणि कानातले घालून सोज्वळ लूकनं सर्वांना भूरळ पाडली. ही अभिनेत्री दुसरी-तिसरी कुणीच नसून आपल्या अभिनयाची छाप जगभरात उमटवणारी गुणी अभिनेत्री छाया कदम (Chhaya Kadam). 

आपल्या अभिनयाच्या जोरावर केवळ मराठी फिल्म इंडस्ट्रीच नव्हे तर संपूर्ण बॉलिवूड आणि चक्क हॉलिवूडही गाजवणाऱ्या अभिनेत्री छाया कदम यांनी गेल्या वर्षी कान्समध्ये आपल्या आईची साडी नेसून सर्वांना आश्चर्याचा धक्का दिला होता. जिथे इतर अभिनेत्री दिग्गज फॅशन डिझायनर्सचे महागडे डिझायनर ड्रेसेस निवडतात, तिथे छाया कदम आपल्या आईची साडी नेसून दिमाखात कान्सच्या रेड कार्पेटवर उतरल्या. त्यांच्या साधेपणानं आणि आईसाठीच्या प्रेमानं सारेच भारावून गेले. अशातच यंदाच्या वर्षी छाया कदम काय करणार? असा प्रश्न साऱ्यांनाच पडलेला. यावर्षीही छाया कदम यांनी आपल्या साडीची जादू दाखवली.

काही दिवसांपूर्वीच मूळच्या कोकणातल्या असलेल्या छाया कदम आपल्या गावी गेलेल्या. तिथे त्यांनी आपल्या बालपणीच्या मैत्रीणींसोबत छान वेळ घालवला. आपली मैत्रीण एवढ्या मोठ्या आंतरराष्ट्रीय स्तरावर पोहचलीय, याचा त्यांच्या साऱ्या मैत्रिणींनाही फार अभिमान होता. त्यासाठीच त्यांनी छाया यांचा साडी देऊन सत्कार केला. आपल्या मैत्रिणींनी प्रेमानं भेट दिलेली साडी छाया कदम यांनी यंदाच्या कान्स फिल्म फेस्टिव्हलमध्ये नेसली होती. आणि त्यासोबत कानात त्यांच्या आईचे कानातले आणि नाकात आईचीच नथ घातली होती. छाया कदम यांच्या सोज्वळ आणि साध्यासुध्या लूकनं सारचे भारावून गेले.